主席搵人打球員續發酵 士砵亭多4人要求解約
解約士砵亭波基斯費南迪斯巴斯杜斯謝臣馬田斯威廉卡維奴
喺上個月士砵亭喺葡超最後失落歐聯席位後,有一班激進球迷闖入訓練基地攻擊球員,最離奇係背後嘅指使人竟然有傳係主席般奴卡華路。雖然單嘢未經證實,不過根據葡萄牙傳媒報道,士砵亭周一透過葡萄牙證券交易委員會宣布,四名主力球員已經申請同球會解約,佢地分別係前鋒巴斯杜斯、中場謝臣馬田斯、威廉卡維奴同波基斯費南迪斯。
連計早前已經提出同球會解約嘅守門員魯爾柏迪斯奧同前鋒普丹斯,已經有六名球員想同士砵亭解約。今次解約嘅四名球員都係國腳級球星,巴斯杜斯係荷蘭國腳,而其餘三人都係葡萄牙世界盃國腳,估計四人身價相信超過一億歐元。
而最新四名球員嘅解約,相信都係同襲擊事件有關。據報佢地都有寫信俾球會以及葡萄牙足總,要求喺30日內解除自己現有嘅合同。咁樣單方面解約唔知成唔成真吖,但如果成事,相信呢班球員喺自由市場都會成為列強爭崩頭嘅對象。
--------------------
《體蘋果》陪你睇波講波
https://www.fb.com/appledailysports
--------------------
王道日本足球手機遊戲《BFB CHAMPIONS 2.0》,日本國家隊實名登場! http://bit.ly/2xrTKGM