驚慄片《小丑回魂》（IT）嘅小丑醜樣又嚇人，但觀眾明顯非常受落，全球票房現已大收5億美金（約39億港幣），而香港票房同樣成績驕人，現已收過1千萬票房。眼見電影大賺，電影公司當然添食，有關方面已公佈續集將於下年9月6號上映，暫名《It: Chapter 2》。

故事將會繼續集中講Stephen King原著小說嘅下半部，即係第一集嘅27年後，而「the Losers Club」嘅小朋友都會於第二集以回憶方式出現。雖然電影仲未確認任何卡士，不過就有好多影迷希望實力派女星謝茜嘉謝茜婷（Jessica Chastain）演出成人版嘅Beverly，而導演Andy Muschietti都放風話謝茜嘉有可能加入！