細個打機玩「接水管」玩得多，跌水管你又見過未？有多名住客報料，東涌屋苑昇薈發生一宗離奇爆水管事件。

一段長逾20米的L型水管，上月29日早上11時許好似從天而降咁，由地下停車場的天花塌落嚟，咁啱個噴水口面向牆壁，水柱源源不絕從管道激射而出，最終搞成個停車場變咗「水禾田」，幸好坑渠口去水去得快，加上漏出的都係食水，泊喺車位的私家車只係浸濕咗個轆，無乜受害，不過爆喉搞到水務署要派水箱車到場增援，安排受影響屋苑住客到水箱取水，部分單位要到翌日先恢復正常供水，大感不便。

其中一名住客陳小姐就話，涉事水管早前畀住客發現有少少鬆脫，估唔到會成段跌落嚟，仲要係連喉碼甩埋，好彩今次無扑中人，如果中頭獎肯定非死即傷，質疑呢個入伙唔夠3年的屋苑，點可能咁快有整段喉管甩脫，希望發展商同管理公司檢討維修保養質素咁話。

查實位於東涌迎康街的昇薈係東涌填海新發展區首個入伙屋苑，2016年3月入伙，發展商為南豐集團，估唔到呢條水喉會化學成咁，如果其他住客睇到條片，唔知會唔會嚇親呢？

你敢爆，我敢獎！ 即Call《蘋果》24小時爆相爆片熱線 ：63836568