講番《喜劇之王》，除咗主角周星馳、吳孟達、莫文蔚同張栢芝等，其實班配角都勁出。比較多人識嘅係「甜筒輝」，原名鄭文輝，懵吓懵吓由場記都躍上大銀幕，除咗《喜劇之王》之外，仲參演過《行運一條龍》、《食神》等星爺作品，其他佢又做過《蘋果》副刊編輯，又去過有線為美國動畫劇集《衰仔樂園》香港版擔任監製，其後再喺鄭中基執導嘅電影《神秘寶藏》中扮演黃子華嘅擦鞋仔。

仲有喺戲中演反派嘅袁富華，佢喺戲中扮演黑社會頭目，達哥上門索料時，同達哥夾好嘅星爺以外賣仔身份現身照應，點知臨場出事，但星爺不知就裏，入咗屋，生命有危險。袁富華勁醒目，用外賣價錢嚟試探星爺，最尾一句：「你唔係外賣仔！」最為人記得。其實袁富華喺《喜劇之王》後都有喺演藝圈發展，近來亦拍咗個新廣告，仲食番佢呢句經典對白，大家可以留意吓。

另外，已經升任為導演、先後執導過《寒戰》、《寒戰II》及《赤道》嘅陸劍青，當年亦係《喜劇之王》中一員，佢扮演杜娟兒（莫文蔚角色）新戲策劃者之Johnny，有同星爺做對手戲。當年嘅陸劍青擔任副導演，順道粉墨登場。

最後，當然一定唔少得「霞姨」！但原來，霞姨係幕後人員，連個名都冇出過，問過好多行內人，都冇人知「霞姨」嘅去向……