德國駐港總領事館過去幾年，喺唔少香港嘅政治問題上都算高調，但原來喺2013年7月到港履新做德國駐港澳總領事嘅蘭布斯多夫（Nikolaus Graf Lambsdorff），將會喺8月離任。平日接觸好多外國領事嘅民主黨前主席劉慧卿，上周六晚獲邀出席Lambsdorff嘅惜別酒會。

卿姐話，有領事平日真係可以對議員不瞅不睬，但亦有領事盡心盡力，聯絡各方各派聽意見，德國嘅Lambsdorff就屬於後者，大讚Lambsdorff係好專業、勤力，早幾年仲喺佢穿針引線下，讓立法會組團訪問德國，見識吓當地嘅選舉。卿姐話，稍後仲會同Lambsdorff同埋佢太太食多一次飯，正式告別，佢笑笑口話，食餐飯唔係叫做勾結呀？

近幾年，德國領事館喺Facebook透過教德文生字「抽水」，令人回味無窮，月初六四集會就教「忘記」呢個字，以「人民不應忘記歷史」做例句，之前又教吓「普選」嘅德文點講，唔知新任德國駐港澳總領事，會唔會保存呢個「傳統」？