立法會即將復會，佔中又未解決，公民黨余若薇唔使問一定忙到抽筋，至於佢老公胡健維醫生，畢竟唔係政界中人，亦已一把年紀，只能喺背後默默支持太太。
雖然港島同旺⻆交通受影響，但沙田馬場一帶就好暢順，所以一定唔會影響胡健維入場攞正牌尋「歡」。胡醫生過去養過一匹戰績好差未曾建功嘅「靈感」；到咗六、七年前則有匹「一鳴驚人」贏過兩場，可惜好快就因健康問題退役。不過咪以為佢次次養馬都麻麻呀，現役所屬唯一團體隻「百年歡」就好有潛質，上季喺柏寶胯下，以強橫後勁勝出，爆16倍冷W好和味，踏入今季五歲成熟更進一步，一出又後上贏馬，擊敗實力相當強嘅「君悅灣」掄元，走勢有餘未盡。當日胡醫生都有在場主持大局拉頭馬。好嘞，今期「百年歡」勝後再出，機會如何呢？隻馬角逐田草1600米，呢個路程佢過去三戰得兩冠一亞，百分百入Q，柏寶停賽，立即搵手風順騎功同樣超群嘅巫斯義操刀，睇嚟胡醫生又可以殺入凱旋門喇！