鄧小巧首個個人騷「Interstage 2018：鄧小巧 INNERSTRENGTH 音樂會」，將於下月喺演藝學院嘅戲劇院舉行，日前公開賣飛時，因為得幾百個座位關係，好多小巧歌迷都搶唔到飛。

過往好多演唱會嘅飛都俾黃牛炒飛，但今次小巧嘅歌迷遇到嘅並唔係黃牛，而係疑似騙案。

鄧小巧今日喺社交網站出咗一個表示「我實在太傷心同憤怒！」嘅post，仲放咗幾張對話內容嘅照片出嚟，表示有歌迷話俾佢知，有人藉住佢個騷嚟呃歌迷錢。

小巧貼出咗歌迷提供嘅對話截圖，其中一位歌迷A向放飛者購入五張$200正價飛，放飛者先叫歌迷入$900到指定戶口，剩低$100再當面交收。但當歌迷入咗錢之後，放飛者就話因為「比較多客人想要出高價收，所以現在要入多$1,100訂金留飛，之後交收會退回$1,000」。聽落仍然係原價買飛，而小巧亦冇交代呢個歌迷最後有冇拎到飛。

有網民留言謂：「啱啱都差啲中伏，成件事好詭異，佢打電話嚟要我入$500落訂，我覺得有鬼，所以話唔要，然後佢再pm我話落訂$200都得，又唔肯交收嘅時候俾錢。」另一網民也稱：「一開始話要$50手續費，我當佢出嚟交收車費來回都要錢啦，但如果佢真係有心唔想貴讓俾人，就唔會因為有人出更高價就要入多啲訂，而係先到先得。」

翻查過往紀錄，其實呢個疑似騙徒，曾經用一樣嘅方法，「賣」林俊傑演唱會飛。嗰次嗰位歌迷俾埋加咗價嘅訂金，但放飛者話要再次加訂，最後都係攞唔到飛，搞到報警處理。

小巧懷疑有歌迷被騙，呼籲歌迷有損失一定要報警，仲提醒fans：「如果有人轉讓飛，一定一定要當面交收！」，不過最後佢都表示「希望唔係騙案」。

所以都係奉勸大家，唔係經正常途徑買飛時，真係要小心啲！

精選娛聞，喺晒《娛果》
http://fb.com/appledailyent