韓國型男宋承憲自從公開咗同內地女星劉亦菲嘅戀情後，佢都好樂意喺傳媒面前談及女友，而佢哋嘅定情電影《第三種愛情》將於下月30號喺內地上映，宋承憲近日接受傳媒訪問時就大方提起劉亦菲。

宋承憲自爆一直都係女友嘅粉絲，一直都好想同佢合作，佢話：「冇諗過第一次喺內地拍電影就能實現呢個願望，而且導演又係我嘅好朋友，我哋三個配合非常有默契，所以我覺得我非常幸運。我哋拍嘅係愛情片，今後如果有機會嘅話，我都想繼續同劉亦菲合作，一齊拍吓動作電影或者其他類型嘅電影，就算唔演情侶，演仇家都可以。同劉亦菲合作對我而言係一次好美好同埋好珍貴嘅回憶。」

宋承憲繼續講甜蜜說話冧劉亦菲，仲話：「雖然呢部同佢係愛情戲，但都想同佢一齊拍動作電影，一齊拍攝出一輩子都唔能夠忘記嘅作品。」宋承憲又大讚劉亦菲，雖然自己大過劉亦菲11年，但係宋承憲就話女友好多時候都比自己成熟，又話：「佢係一名非常出色嘅演員，常常能關照別人，佢呢啲優秀嘅品質觸動咗我嘅心。我哋依家都非常喜歡彼此，我希望呢種美好嘅感覺能夠一直延續下去，亦都希望佢亦都能一直咁樣走下去。」