一年容易又中秋，暑假雖然未完，但已經開始見到月餅廣告，近年豬籠入水嘅張智霖（Chilam），第三年為美心冰皮月餅擔任代言人，Chilam同傳統月餅代言人陳慧琳（Kelly）早前聯同幾位小朋友，去到一個森林登山，拍攝新一輯電視廣告。

Chilam話拍攝過程猶如家庭遠足，拍嘅時候特別掛住囝囝魔童，Chilam話：「為咗畀囝囝過一個特別中秋，買咗一支天文望遠鏡畀佢賞月，可以清楚睇到月球表面坑洞，好似自己飛咗去月球咁，阿仔都相當興奮。」Chilam話已經預留時間同老婆袁詠儀、囝囝一齊慶中秋，享受人月兩圓。