新婚嘅周柏豪真係醉心工作，婚後冇耐就返嚟香港開工，日前又飛咗去柬埔寨吳哥窟。做咩？之唔係跑10k馬拉松囉！等等先，乜馬拉松唔係42.195公里咩？幾時10公里賽都變埋馬拉松o架？冇錯，呢個都係網民嘅疑問。

話說柏豪日前喺facebook share咗喺柬埔寨跑完10公里賽嘅片段，仲話：「10km馬拉松，我們完成了」之後仲多謝贊助商，不過就因為咁而一句激嬲唔少網民，留言仲清一色同人夫柏豪講，10k同馬拉松係有分別，以為咁就係「公關災難」？小子你太年輕了，世事邊有咁簡單！

fb專頁《公關災難》開post發現人夫柏豪參加嘅呢個名為「Angkor Wat International Half Marathon」賽事，而人夫柏豪嘅post入面見到佢喺片段上嘅號碼布number係「5221」，而喺專門查詢比賽成績嘅網站sportstats入面明顕示，「5221」係由一位名叫「Lindsay Coburn」嘅男士持有，而人夫柏豪呢？同佢英文名「Pak Ho Chau」嚟搜尋發展人夫柏豪嘅號碼布應該係「7157」，而且「Pak Ho Chau」呢個名竟然係女人，而資料顯示呢位參賽者係未有完成賽事，專頁仲話聽聞柏豪只係跑咗400米！到底真相係咩？真係睇唔透！

而當時人柏豪回覆《蘋果》查詢，佢就大叫冤枉，佢解釋今次賽事嘅號碼布係由大會提供，所以掉轉號碼布呢件佢係唔知情，至於未有完成賽事佢就話：「去到吳哥窟我都諗住跑呢個10k賽事，不過去到後發現原來賽道設計唔夠香港咁完善，冇一個封咗嘅賽道，嗰邊跑手同車係一齊去行，同大會溝通咗之後就唔准一路拍攝一路跑，因為我係唯一一個代表manulife同大會宣傳呢個賽事，所以同大會溝通咗放棄比賽去拍攝，一開我都有跑，跑咗1公里就停埋一邊，等其他跑手跑咗先，我先再喺賽道拍攝。其實係最後6k半左右，開始跑去終點，大會都問我要唔要坐車去終點，我都拒絕咗。」最後柏豪仲講到運動無論係籃球定跑步都係佢興趣，出到嚟變成咁令佢都有啲遺憾！