港台《城市論壇》下個月6號復播，主持亦由謝志峰換上「蘇B」蘇敬恆，謝志峰噚日就為呢接班人進行閉門特訓，仲請嚟多名《城壇》名人做「臨記」，扮台下觀眾，除咗有前日至同港澳辦副主任馮巍撐枱腳的白鴿黨副主席羅健熙、民建聯副主席周浩鼎、自由黨青年團主席李梓敬，同埋「維園阿伯」文先生外，連久別《城壇》嘅「維園阿哥」、馬草泥任亮憲都畀面「復出」，同其他嘉賓激辯港大副校長委任風波。
呢場特訓其實好逼真，台下嘅李梓敬、文先生一樣有叫有衝，謝志峰又扮保安阻人衝上台，周浩鼎發言時如常地落力撐政府，博得現場唔少扮演建制派支持的臨記歡呼，睇睇下其實都幾好玩。

自爆係男拔師兄弟

任亮憲同八方講，自己好耐冇去《城壇》，但一直好支持呢個節目，因為呢個係唯一一個全程直播出街港台節目，任亮憲又慨嘆自己同峰哥識咗好耐，兩人感情深厚，覺得峰哥主持好持平，日後《城壇》冇咗峰哥，即係冇咗個標誌性人物，係所有觀眾損失，希望峰哥日後喺新平台再發聲喎。
至於佢會唔會再現身《城壇》？任亮憲就話：「會盡力而為，啱嘅題目，啱嘅人物，一定到。」又爆新主持「蘇B」其實係低佢兩屆嘅男拔萃師弟，佢就覺得「蘇B」處事一向不慍不火、好淡定，相信遇到突發事都可以處變不驚。羅健熙噚日亦話，覺得「蘇B」做主持表現一直幾好，相信一定做得掂喎。

李八方
mailto:[email protected]