煲呔就唔同,由於係香港土生,有優勢,煲呔可以去到荷李活道警察宿舍玩親情大念舊,緬懷「樓下閂水喉」式生活,肥彭就去唔到咁盡嘞!
身為爵士,都重走去香港仔坐吓艇,買吓生果送畀啲漁民,表演香港人、香港心、香港情。
煲呔上場後,民望一直高企,不過希望佢唔好天真到以為日日都係年初一,好似最近一啲關於六四、23條嘅言論,明顯就唔係想講畀香港人聽,而係想向中南海諸公表演政治正確。須知道老董最初民望都企過靚位,一衰起上嚟就恨錯難返。
好多最初對老曾有期望嘅人,現在都開始有話講,對於未來特首嚟講,真係唔多值得恭喜。
現時嘅反曾勢力,同七年來反董嘅民間呼聲不同!反曾勢力品流複雜好多,有反港英餘孽嘅土共老左滲入,將仇恨陳方安生嘅餘恨全盤轉嫁落煲呔身上,亦有今次推舉上海籍太子黨上位唔成嘅自由黨,亦有公務員內部唔順煲呔嘅勢力。