何基佑今日喺中環半山以大使身份出席「心肺復甦教育計劃」開幕，佢話細個做童軍嘅時候都有學過急救，但係就稱唔上專業：「嗰時爸爸仲買咗本急救書畀我睇，其實每個人都可以係急救員，所以學咗都係好好。」

何基佑仲分享身邊朋友嘅經歷，試過有警察朋友突然心臟停止，好彩身邊即時有人幫佢急救：「幾個月後我見番呢個朋友，覺得生命真係好重要。我哋身邊啲朋友年紀都開始大，都想學嚟幫身邊嘅人。」

另外，何基佑喺7月宣佈老婆陀第二胎（新聞連結： https://bit.ly/2y1dnHa ），講到囡囡喺年尾出世，佢笑言好輕鬆：「一切從簡，衫嗰啲都係睇下邊個生完女問佢攞，環保啲嘛。心情都好期待，不過就唔太緊張，反而阿仔緊張啲，日日錫住媽咪個肚，問妹妹喺入面做緊咩，點解唔快啲出嚟。我就會同佢講，要夠時間先可以出嚟㗎，千祈唔好咁早。」

至於何基佑早前拍嘅《超級奶爸》第二輯，預計喺11月播出：「今次都係有7個家庭，不過之前講嘅『嘉欣系』嘉賓就請唔到，但係都請咗經驗老到嘅陳國邦、陳倩揚，我喺佢哋身上都學到嘢，因為我講理論啫，佢哋已經經歷晒。」

精選娛聞，喺晒《娛果》
http://fb.com/appledailyent