陳嘉桓（Rose）及周柏豪噚晚出席謝票活動，對於近日有報道替Rose同衞志豪拍拖多年，Rose就澄清兩人係朋友關係，佢話：「朋友啫﹗之前一大班朋友食飯，通常身邊男仔，都被冠以『男友』稱呼，我得22歲咋，點會同佢拍到幾年拖咁耐？」

咁衞志豪係咪你杯茶呢？Rose就話：「如果要揀，我會揀一啲好似戲中柏豪個角色，令自己有改變，同埋係一個開心嘅男仔。」Rose強調現時冇拍拖，亦唔係公司唔畀拍拖，只係自己想專注工作。

另外，Rose表示出席過呢部戲幾個謝票會，佢話：「我見到有啲學生，為咗做通識科功課，老師帶佢哋睇戲，然後做功課，呢部戲係講呢個社會有好多引誘，的而且確係，好似喺圈中有女仔朋友，曾經畀過我睇電話message，有人邀請我朋友出席特別飯局，仲嗌我朋友開價，我叫朋友呢啲梗係唔好開（價）啦，做人最緊要踏實。」