韓國天后李孝利最近成日喺個人網站，公開自己同老公李尚順喺濟州島嘅農莊生活，上次仲拎咗自己種嘅有機黃豆去自由市場度賣。點知，李孝利最近就因為呢件事而闖出禍。

據知，李孝利日前喺網上公開自己賣黃豆嘅情況，仲擺咗張寫住「有機」黄豆嘅相之後，一個網民就向國立農產物品質管理院查詢，發現原來李孝利所賣嘅黄豆，冇按照韓國相關法律得到認證，因而犯咗法。

根據韓國法律規定，如果冇取得相關認證，而私自生產同銷售有機食物的話，將會被處罰3000萬韓圜（即港元約21萬），或3年以下有期徒刑。

對於李孝利違法售賣有機黃豆，李孝利嘅公司就話李孝利之前並唔知道有機食物認證嘅制度，所以先會喺自己賣嘅黄豆上，標註係有機食物。

而李孝利亦已經删除咗之前所公開嘅相，仲委託國立農產物品質管理院，對自己嘅黃豆進行有機食物認證，喺冇耐就會有結果。