剛過去嘅周日，王光亞、李飛、張曉明呢三位主理港澳事務嘅中方官員喺深圳同立法會議員會面，全程嘅焦點當然係佢哋同泛民閉門會面啦。不過，花生友今日想講嘅係泛民議員開到聲叫佢咪搞破壞，都仲係厚住面皮列席會面嘅特首梁振英。
梁振英會面之後馬上封後門，話如果政改否決，政府之後就會放下政改，集中改善民生，呢番話，上星期立法會特首答問大會都有講過。
有心水清嘅政界中人就提花生友，話梁振英之前話「六四嘅活動年年都有」，叫泛民議員珍惜同中央官員見面嘅機會，仲話就算泛民表明否決，見面時都可以討論否決後嘅安排。

或兩年內唔再埋枱傾

嗱，問題就喺呢度，梁振英一再講明否決方案後要「放下政改」，叫泛民去傾否決後安排咪又係語言偽術。上次政改由特首到一眾司局長都出力向中方、泛民游說，先可以促成其事，反觀今次政改，有唔少官員私下同花生友呻，搞到如斯僵局「關鍵係特首」。
花生友聽聞，泛民議員席間真係猛追問否決之後會唔會有溝通平台，可以商討如何重啟政改，同埋如何解決雙方欠缺互信嘅問題等，好似工黨何秀蘭就重提佔領期間，政務司司長林鄭月娥曾向學聯承諾的官民政制溝通平台咁。
不過，有建制議員認為，建立溝通平台係泛民一廂情願，否決之後起碼兩年內唔會再埋枱傾政改。

花生友