噚日（6月23日）係任賢齊52歲生日，同佢同年同月只係大佢一日（6月22日）嘅台灣導演鈕承澤（豆導），仲嚟咗同佢一齊慶生。小齊喺Instagram度上載咗相，兩個男人一齊飲吓酒切蛋糕，小齊留言︰「相識30年！第一次合體一起過生日！」不過，亮點係小齊嘅發福圓潤嘅身形，仲有個阿叔大肚腩。

向來型爆嘅小齊，搞乜鬼變咗個阿叔咁款，仲要有個大肚腩，搞乜鬼呢？其實小齊係為咗嚟緊部新戲嘅肥佬角色，佢之前出活動曾經大呻過，今次唔止搞到啲衫同褲唔啱着，仲要佢最憎嘅嘢都要做齊，包括肥、大肚腩、唔梳頭，同埋尾指留指甲，因為角色係個行蠱惑嘅麻甩佬。為咗谷肥自己，小齊要日食6餐，體重真係快速上升，就連血糖同血脂都搞到偏高，到時拍戲到尾段又要減番磅，佢肚皮又脹又縮，今次佢真係為藝術犧牲。

精選娛聞，喺晒《娛果》
http://fb.com/appledailyent