呢兩日橫風橫雨就算擔咗遮，一行出門口就全身濕晒，何況對鞋同對襪。今日應該好多人著住對濕咗嘅鞋同襪返工，感覺一啲都唔好受，《蘋地》小編為大家搵咗6個方法極速乾鞋。

第一招：報紙塞塞塞
呢個方法應該好多人都知道，相信一般辦公室都有報紙，非常適合一眾打工仔。做法極之簡單，只要將你手上嘅報紙搓成球體，再不停塞塞塞，將鞋嘅內籠塞滿，最後再用報紙包住對鞋就搞掂。要留意當報紙濕透，可以換上新嘅報紙，效果更佳。

第二招：紙袋、公文袋再塞
除咗報紙以外，辦公室一定唔少得有「雞皮紙」，即係公文袋嘅質地。而方法同報紙一樣，只要將你有嘅公文袋將鞋筒塞滿就可以，放工嘅時候鞋就會由濕變返乾。

第三招：竹炭包吸濕
竹炭嘅吸濕力極強，而且有除臭功能，只要將竹炭包放喺濕嘅鞋入面就可以又乾又唔臭啦。

第四招：物品撐起掠鞋
呢個方法應該較少人聽過，其實只要用物件將鞋身撐起就能夠令鞋更加快乾，原理係令鞋筒入面有更多空氣流通。

第五招：乾手機大力吹
相信大家公司嘅廁所應該都有乾手機，只要將鞋帶解開，同埋將「鞋舌」翻出嚟，之後喺乾手機吹乾，就有乾鞋嘅效果，但要小心唔好俾同事見到話你噁心呀！

第六招：私人豪華乾鞋機
日本Thanko公司推出嘅小型乾鞋機，只要將佢夾喺鞋上面再開機，獨有嘅發熱器就會向鞋入面吹出熱風。呢個咁豪華嘅乾鞋機價值港幣$239，小編都係用返報紙算喇！

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland