美股上周五高收，最新公布的美國就業數據理想，刺激杜指彈升77點，納指亦升28.75點。不過，油價亦三扒兩撥跳上64美元水平，股友樂觀之餘，還應保留三分戒心。股市此際氣勢正盛，油價回升暫時冇人理，但到得股市要調整之時，「高油價等如高通脹、高通脹等如高利率」呢條方程式，又會人人掛在口邊。
美股收得靚，港股今日高開機會甚大，且看能否衝破去年8月高位15508，並企穩其上，擺脫技術指標的背馳威脅。
上周提到滙控（005）睡醒，走勢大有轉機，炒友如趙飛雲者，當然要搵隻滙控C輪炒番轉。對象有兩件，分別係4907同9546，同文章盛兄一早推介4907，隻輪上周五微見負溢價，益覺抵買，唯一「缺點」係街貨漸多。9546不及4907便宜，但亦不算貴，溢價不過0.8%，有效槓桿達19.4倍，好處係街貨少，只佔發行量13.4%。
超人日前表示，如無意外，意大利3G業務可於今春分拆上市，屆時將可反映3G業務的潛在價值。和黃（013）股價落後大市，看來會趁此消息追回多少，搵和黃C輪炒，對象有9466同9790。不過，大市今日若高開太多，趙飛雲不會追買C輪，會等調整至郁手。