28歲無綫咪神張曦雯（Kelly），好多觀眾識佢係因為「Porn Tonight」—— 唔好心邪，因為佢主持明珠台《Pearl Tonight》，樣子標緻身材火辣仲係華姐冠軍，所以網民先至幫佢改咗個暱稱，叫做「Porn Tonight」嘅稱號，你當等同「BB」咁就OK喇。

「Porn Tonight」向來桃花旺，由胡杏兒老公李乘德（傳撻著嗰陣未結婚嘅）、黃淑儀個仔徐肇平（女嘅認男嘅就好怕醜…），莊思明富二代舊愛Daniel，仲有就係莊思華男友、著名練馬師告東尼個仔告崇恩等等等等……唔知「Porn Tonight」係咪同莊氏姊妹特別有緣，所以莊思華之後急拖男友馬場示威，算係「宣示主權」咁話。

「Porn Tonight」堅稱自己依家單身，得閒就返屋企做「宅女」直播打機，但最近爆出佢同城中富豪拍拖單嘢，就甚囂塵上。傳聞係由一架波子講起。事緣平時以Uber代步嘅「Porn Tonight」，今年4月底突然一擲至少120萬，買咗架黑色新款保時捷四驅車，仲特別以自己英文名字字頭配以生日日期「511」作車牌。

咁，「Porn Tonight」月薪幾多，路人心中有數。忽然富貴，梗有計仔，富豪追求傳聞亦不逕而走。當時佢嘅解釋就係分期付款、自食其力、同埋儲錢儲番嚟。佢仲話：「其實公司都好多人有呢部車！」嗯嗯嗯。

今日有周刊聲稱揭露到追求「Porn Tonight」嗰位富豪真正身份，報道引述知情者稱，該富豪坐擁億萬身家——係億萬！

呢位富豪外表四平八穩咁啦，有過一段婚姻，離婚後鍾意識下娛圈小花咁，家住淺水灣。至於佢同「Porn Tonight」點識嘅呢？應該就唔係打機識嘅，據報道指兩人去年於飯局交過手，嗰陣女方仲同Daniel一齊，但富商對「Porn Tonight」一見如故，明知人哋已有男友（仲係有米嗰隻）都照追。

即係咁，就好似大魚食細魚咁，好正常啫！