似係現代包青天嘅申訴專員戴婉瑩下星期二退休，正式結束35年公務生涯。臨別暢所欲言，佢噚日話自己角色似球證，要以事論事，合理公平咁判斷政府部門有冇行政失當，遇有刁民無理取鬧，佢亦唔會客氣，舊年有人攞綜援狂買Gucci眼鏡，仲反投訴社署，就抵鬧到極。
政府部門俾人捉到痛腳，被批評事小，冇face事大，戴婉瑩話如果有部門不配合公署調查，會先同部門首長傾傾，勸喻最好坦白從寬。若對方唔飲敬酒，就會使出尚方寶劍，即係進行直接調查，「對方就要畀晒所有資料同報告我哋睇。」

低位購辦公室

人人都係打份工，事事對着幹亦冇乜意思，因此戴婉瑩處事原則係「話到口中留半句，理從事處讓三分」。「政府部門知道你手下留情，冇去得咁盡，亦會乖乖接納意見。」佢話絕大部份政府部門都非常合作，喺過去十年，接受公署改革建議比率由95%增至98.2%。
做足十年申訴專員，戴婉瑩任內最自豪嘅貢獻，並唔係令某個部門改革，或者為小市民申寃，而係02年喺低位入市，以九千幾萬元買入上環招商局大樓30樓同25樓共一層半樓面做公署永久辦公室，事隔多年，仍然保持近年呎價最低紀錄，去年樓市勁升，更加賺到笑，雖然只係賬面數，但都好鬼開心。

買焗爐做主婦

數口咁精，戴婉瑩自詡係講價專家，最新傑作係以約十萬蚊價錢，買咗套原價十幾萬嘅高級煮食爐，呢個海嘯價真係抵到爛。佢話退休後會重返「煮婦」崗位，自問入得廚房，中西美食都難佢唔到，過時過節更會煮鮑魚，所以買定個大焗爐準備大顯身手。
戴婉瑩噚日罕有批評高官問責制，指局長同公務員合作不暢順，既然佢退休後無意從商或論政，轉做「焗長」都唔錯。一心做焗長嘅戴婉瑩唔係話退就退，下月會以義工身份探訪內地，6月則以國際申訴專員協會秘書長身份到瑞典出席該會成立200周年活動，之後先真正告別江湖。

mailto:[email protected]