曾演出韓國育兒節目《超人回來了》嘅「得意妹」秋小愛，雖然月初先同媽咪矢野志保飛到韓國搵「國民三胞胎」大韓、民國、萬歲聚舊，不過似乎逗留咗幾日就返回日本。但今日小愛就孖住老竇秋成勳現身金浦機場，原來係受邀到韓國宣傳動畫電影《藍精靈：迷失的村莊》（Smurfs: The Lost Village）。

小愛同老竇更獲藍精靈公仔喺機場接機，不過一步出接機大堂見到咁多人，小愛都仲係唔多習慣，繼續匿喺老竇後面，及後更加要老竇抱抱，但過咗一陣就回恢返得意搞鬼嘅性格，對住媒體鏡頭都笑得燦爛。雖然小愛依家先5歲，但遺傳模特兒媽咪嘅好基因，四肢纖瘦，而且已經高到老竇條腰，真係大得好快！

另外，《超人回來了》節目組今日公開咗人氣王大發BB嘅新預告，只見今集大發BB要自己一個幫老竇李同國做跑腿，去問人拎蜜糖，唔知佢成唔成功呢？