世事那有這麼完美！這晚（18日）谷草大紅人騎師田泰安，在最尾第八場三班一哩開跑前已揸住三Win，叫落尾場大熱門「招多福」（苗禮德馬房）等埋齋食大四喜。

點知轉最後直路彎時，「招多福」飛出冇雷公咁遠，就咁返嚟追唔切屈居亞軍，田泰安大四喜夢碎。不過，季內首次在谷草中三元嘅安仔，依然壓倒今晚只贏一場的雷神勝出騎師王。

至於第八場頭馬，結果由沿內疊慳位殺上，方嘉柏馬房、潘頓策騎之「勢必跑」勝出，單Win及組合獨贏A2分別派45.5及19元。

「勢必跑」排3檔好位，沿途居於甚後位置，直路在潘頓胯下楔內欄慳位竄上，結果克服133磅，以一頭位之先擊敗「招多福」掄元，這匹6歲法國自購馬取得歷來在港第五Win。

尾場二至四名順序為「招多福」、「紅運精彩」及「睡德福」，四重彩派十萬蚊鬆啲。

全晚潘頓贏第五場葉楚航馬房「心慷慨」及第八場方嘉柏馬房「勢必跑」起孖，成為全晚最佳成績之澳洲籍騎師。