當年今日
關於我們

【韓流】被拒入VIP區睇Rain薛芷倫嬲爆走人

蘋果日報 2016/01/31 06:00

蘋果香港韓國薛芷倫rain即時天堂鳥

韓流天王Rain事隔成6年先再度嚟香港開騷,唔少明星都有捧場,不過近日同內地網民喺網上開拖嘅「Ball后」薛芷倫,佢噚晚去咗九龍灣國際展覽中心出席癌症基金會周年慈善餐舞會,所以就未能親到亞博館欣賞Rain嘅演出,但佢得知Rain做完騷後會去中環夜店PLAY嘅afterparty,薛芷倫亦聞風而至,於凌晨1時左右薛芷倫就以一身太后look現身PLAY,打算趁早到場擺定靚位同Rain集郵。

當時Rain仲喺九龍塘食緊宵夜,所以仲未現身,由於有韓流天王駕臨,所以PLAY嘅保安都好嚴謹,平日VIP區只得兩名保安守衛,平日限制入場VIP亦好鬆,見你係熟客都會畀你就咁走VIP區,唔會刻意check,但噚晚就一律冇面畀,所有出入賓客都要過咗守喺門口嘅5、6名黑人保安關先,保安會要求所有出入賓客出示佢哋手上係唔係有VIP手帶先,如果冇手帶就唔使旨意入場,就連明星名人都唔畀入,認真嚴格。

所以當打扮到靚一靚嘅薛芷倫出現喺VIP區時,唔知佢係唔係冇被邀請定咩,佢就因為冇個條VIP手帶,所以即時被黑人保安阻止入VIP區,令佢企喺門口又尷尬又激氣,身為PLAY老闆之一嘅清洪契仔巫翊鳴見狀都即刻行過去安撫薛芷倫,不過安撫還安撫,出動老闆都冇情講,巫翊鳴帶咗薛芷倫去另一邊嘅梳化位玩,不過薛芷倫都表現得好嬲嬲豬,最後就索性離場,走時仲晦氣地同身邊女友人講:「我唔玩嘞,我走。」女友人好聲挽留佢:「我哋去個邊坐啦。」最終薛芷倫拋下一句「算啦」就未等到Rain嚟就轉身走人。

而Rain大約近凌晨2點就從後門進入VIP區,其實現場有唔少粉絲收到風Rain會到場,所以平日PLAY多數以外國人居多,忽然間就多咗唔少追星族嘅物體喺現場。Rain到場後都有同啲老闆係佈景版前影吓合照,但好快保安又築起人牆,唔畀人接近Rain,搞到天堂鳥等成班小粉絲都唔可以親近偶像,佢哋最終只可以企喺側邊拿出手機希望影到Rain嘅靚仔相。

Rain現身佈景版好短時間,即被帶到場內VIP區嘅死角位,之後保安圍住佢企,基本上冇人睇到Rain做緊乜,天堂鳥因為冇VIP手帶,所以亦冇得入去,只可以企起門口係咁望,真係慘慘豬。