陳伯：Hi！成議員，今日氣喘喘，要唞吓先同你傾到偈！
成議員：陳伯，你成日話自己幾咁健壯，點解無端端氣喘啊？又去房署啲爛磚公屋探仔女跣親啊？
陳伯：今次唔係俾啲爛地磚跣啦！係俾樓梯玩死，上上落落行咗幾轉，條氣都頂住頂住！
成議員：乜陳伯你有仔女住喺唐樓嘅咩？多數聽你講去唔同公屋嘅慘痛經驗，好少聽你話去行樓梯嘅唐樓喎！
陳伯：唔係啊！呢次都係公屋嚟㗎，乜你唔知𠵱家仲有好多公屋無電梯㗎咩？我有個仔住喺沙田博康邨幾十年，曾特首成日話自己當年點樣管得好沙田，條邨咪一樣幾十戶幾十年嚟日日行樓梯，我個仔呢排腳痛，咪去幫佢買吓嘢打掃吓！點知見嗰度成層樓都係老弱，連失明人士都有，諗落都幾無陰功！
成議員：你真係廿四孝老竇，上上落落真係幾慘喎！早排房屋署咪話使成八億幫公屋換電梯，第日係咪會有改善啊？
陳伯：呢個房屋署署長陳鎮源淨係識做戲，早排同民建聯落區就講到天花龍鳳！使公家錢有幾難啊？但就係好似博康邨呢類賣咗部份單位嘅邨，雖然仲有成大班租戶，但係就唔使旨意房屋署會理你嘞！乜都叫你搵業主立案法團搞！咁人哋業主就話諗吓點保養可以幫層樓保值啫，無理由叫佢哋理埋公屋居民嘅需要。

成議員：係啦，啲高官就梗係同啲同聲同氣嘅政黨做秀㗎啦，不過最緊要係居民受惠唔到吖嘛！
陳伯：𠵱家即係陳鎮源署長玩雙重標準，同樣係H型大樓，一樣有大把公屋居民交租住緊，未賣樓嘅邨就使億億去博掌聲，賣咗樓嘅邨就唔使旨意會理吓你，你要行樓梯咪等你行過世啦，咁呢個署長係真心定假意呢？
成議員：同高官講真心咪即係同花花公子講感情，唔好浪費精神啦，計我話就全部公屋送晒畀居民，但維修保養就自己搞掂，到時人人係業主，咁就實識得應使就使，唔使等高官施捨！
《街坊Hi你》歡迎讀者及各界社會人士分享地區事務個案，本欄將盡力向有關政府部門跟進。
聯絡電郵︰[email protected]