金像影后妮歌潔曼（Nicole Kidman）於今屆康城影展相當忙碌，有四部作品展出，妮歌於香港時間今日凌晨出席競賽片《聖鹿獵殺》（The Killing of a Sacred Deer）首映禮，噚日冇出席記者會嘅男主角哥連菲路（Colin Farrell）今日趕到，着西裝型仔登場。出席嘅仲有希臘怪雞導演尤格藍西莫（Yorgos Lanthimos）及片中童星。

妮歌今日着咗條黑白吊帶裙，裙擺散開為妮歌增添咗少少青春氣息。妮歌嘅歌手老公Keith Urban都有出席支持。睇完電影後，眾人從戲院行出來時，妮歌明顯心情帶點激動，攬實老公之餘，亦獲老公錫錫晒恩愛。同一日有另一部競賽片《Happy End》首映。《Happy End》係由奧地利著名導演米高漢尼卡（Michael Haneke）執導，探討歐洲中產家庭如何在難民危機中自處。