仍然係港台新春團拜。咁又唔係個個都當王維基透明，好似毛孟靜、
香港電台電視部助理廣播處長張文新等，都同WiKi有講有笑。其實WiKi嚟之前，記者已經同佢講，話一陣各台嘅巨頭都會到，WiKi話﹕「吓？有邊個嚟？」仲話希望可以同佢哋握握手。

結果？手，握唔到，仲俾盛品儒請食咗個歪面。問WiKi會否趁機爭取發牌？佢話﹕「發牌嘅事係政府責任嚟0架嘛，總之所有資料已經交咗上去0架喇，都係等政府落實。」咁會否邀請同業「幫口」？WiKi表示﹕「同業好支持0架喇，係除咗嗰兩個現有嘅免費電視台唔支持之外。 在商言商，佢哋係有一個矛盾喺度。在於既得利益者嚟講，好自然都係想少啲競爭者，佢有佢哋嘅難處。 但係廣大市民同同業，意見都係一面倒0架喇，都希望多啲競爭0架喇。」

WiKi今日唔知係咪收到神秘消息，總之佢對於三月發牌呢件事，似乎非常有信心。佢話﹕「我哋仍然係好有信心，喺三月底當日，立法會議員同好多政府官員溝通過、訂出嚟嘅一個冇約束力嘅議案，但你見到 建制派議員都支持三月底發牌 ，我有信心呢個日子唔係亂咁訂出嚟，呢個係一個可行性嘅日子，我對三月底發牌好有信心。」但佢又否認政府曾經俾過任何暗示佢，只係話知道政府係做緊嘢。

但之前無綫就政府發牌一事提出司法覆核，WiKi話﹕「 我好相信呢個司法覆核一完咗之後，政府就應該好快咁發出牌照。 」