馮仁昭四圍超：
嘉玲偉仔兩家出埠 東京藥房掃貨 - 馮仁昭
蘋果日報 2015/12/17 00:00
劉嘉玲同梁朝偉兩公婆一直都係各有各忙，但大時大節佢哋會盡量喺埋一齊過，特別係聖誕同元旦，佢哋通常會請假出埠去玩，今年都唔例外，佢兩公婆近日就拉大隊去咗日本度假，日前佢哋喺東京街頭出現，俾內地網友拍到照片放上微博，仲留言話：「在東京銀座偶遇梁朝偉跟劉嘉玲。好激動！」
嘉玲日前俾內地網友影到同弟婦（左）喺東京藥房掃貨。微博圖片
偉仔包到冚
照片中見到戴晒冷帽嘅嘉玲同弟婦一齊入咗一間藥房掃貨，老公偉仔就喺媽咪同死黨吳廷燁陪同下喺門口等，偉仔戴晒冷帽、着咗羽絨，又用頸巾遮咗半塊面，天氣應該好凍。佢一直垂低頭，應該唔想俾遊客認出。噚日打畀嘉玲，問佢係咪同偉仔去咗日本旅行？佢話：「係呀！喺日本咁遠都俾人影到相，啲網友真厲害。我同偉仔同屋企人、朋友去咗日本度假，但聖誕節前會返嚟香港，因為我想返香港過聖誕。」
近幾個月偉仔都係忙緊喺上海拍攝王家衛監製嘅《擺渡人》，大家都知拍王大導嘅戲，唔知幾時先拍得完，所以偉仔都唔理咁多，聖誕將近嘅日子就一定要放假，寧願休息完返嚟再搏殺過。
撰文：馮仁昭
近幾個月偉仔都係忙緊喺上海拍攝王家衛監製嘅《擺渡人》，大家都知拍王大導嘅戲，唔知幾時先拍得完，所以偉仔都唔理咁多，聖誕將近嘅日子就一定要放假，寧願休息完返嚟再搏殺過。
撰文：馮仁昭
全身包到冚嘅偉仔，帶埋媽咪（小圖）遊東京。