ViuTV去年套懸疑驚慄劇《詭探》反應唔錯，早排公佈會開拍第二輯，之前講咗會拍番主角後生版嘅《詭探前傳》，由游學修（三師弟）、麥子樂（大師兄）及陳安立（大師兄）三位年輕演員飾演茅山三兄弟。

今日套劇會開記招，原來重量級人馬係秋官鄭少秋，秋官對上一次拍港劇已經係2012年，相隔6年再拍港劇，問秋官點解今次幫ViuTV拍劇，佢話︰「佢哋誠意打動，而且唔係好辛苦，今次個角色係個教授，又係靈異大師，而且着西裝，官仔骨骨。」秋官一出丁蟹效應又嚟啦！股民要小心。

而網民又點睇秋官再拍劇呢？喺番ViuTV個facebook度，有網民留言話：「故事第一集佢就喺天台丟晒啲徒弟落街」，睇嚟係想recall番《大時代》第一集掟仔落街嘅劇情，另有人話：「怪唔知跌市啦⋯⋯」，係咪真係咁準呀？

精選娛聞，喺晒《娛果》
http://fb.com/appledailyent