林燕妮昨日在中環出席慈善衫義賣活動,捐出過百件衣物,包括一襲14萬元的紅色晚裝及有梁朝偉及劉嘉玲等簽名的Dior手袋,她說:「我一路執嘢一路鬧自己,如果唔買咁多嘢,可以買多幾層樓,今次可以一邊做慈善、一邊教訓自己。」
問到商台於下月為其胞弟林振強舉行紀念音樂會,林燕妮表示並不知情:「所有人都知佢係我細佬,但係我細佬嘅嘢冇人話我知,又冇人通知我。」會否感到不開心?她語帶諷刺說:「我唔係一個小器嘅人,主辦單位冇通知我,就算唔請我都通知我等我買飛,我覺得咁係欠缺禮貌,家屬都唔通知,只係掛住賺錢。」
採訪、攝影:楊潔雯