美股前晚假期休市，亞洲股市噚日好似禾雀亂飛，各自發展。中、港、日股市跌到攤攤腰，上海B股跌7%，深圳B股跌4%，日股跌2.2%，港股跌1.8%。睇番外圍美股期指及以美國市場為主嘅股份如利豐（494）及裕元（551）等可以逆市升，又似乎唔關美股事。

留意中資去向
趙飛雲八卦睇一睇內地A、B股指數，發現今年A、B股開市至今幾乎係跌唔停，1月未完，深圳A股指數已跌21%，深圳B股指數跌27%，上海A股指數跌17%，上海B股指數跌23%。
如果再計及佢哋去年5月高位嘅累積跌幅，更高達四五成，直情係一個大熊市，喺大家北望神州，期望中國「入世」後繁榮昌盛，帶來無限商機之餘，唔知有冇留意內地可能會有唔少蟹民及大量資金被縛？近期內地股市急跌，慎防中資嘅流向影響港股表現。
恒指跌兩百幾點，但太平協和（438）可以升2仙，趙飛雲都覺得有運，暫時繼續揸住先。噚日按盤路可以買番啲利豐、裕元，博格老禮拜四有好嘢講炒一轉短線。不過計落都似係基金抽高散貨格，加上有Kmart呢個計時炸彈，所以都係唔敢掂。