本報噚日報道，有針對《蘋果》員工個人資料嘅起底網站，洩密源頭疑來自回鄉證，有學者認為嚟自國家級公安機關可能性最高。其實除咗《蘋果》員工，好多政界人士個人資料都俾藍絲起底網公開，好似林卓廷立法會議員辦事處總幹事、有「黑仔王」之稱莊榮輝近日亦發現自己驚現某個起底網，本來被起底有乜咁奇，佢都唔想大驚小怪，但涉及被起底嘅個人電話號碼，竟然係佢早喺2016年結業嘅教育中心辦公室電話號碼，個號碼cut咗成四年，從未公開披露，唔明點解有人搵到，莫非係教育局或稅局職員洩露？

冇披露辦公室電話

莊榮輝同八方解釋，佢喺藍絲起底網被洩露嘅電話號碼，係2016年結業嘅教育中心辦公室電話，雖然有啲教育中心嘅學生會知，但一直未有公開披露號碼，「甚至連一啲好熟嘅黨友都唔知道」，而號碼係教育中心需要註冊嘅資料，所以佢就懷疑嘞，唔通係涉及註冊登記嘅公務員洩露相關資料？

八方問過佢，個號碼又唔算完全冇公開噃，會唔會係有藍絲家長知道後外洩呢？莊榮輝就相信可能性好低，覺得一班家長冇原因要外傳已經cut咗成四年嘅電話號碼。莊榮輝估計，藍絲誤將已結業嘅教育中心嘅電話號碼當作辦事處號碼，以為咁樣可以騷擾到佢，表明一啲都唔驚藍絲嘅惡意攻擊。

李八方