呢一點對於好多企業嚟講,係一個商機。公關朋友同敏妮講,好多時啲生產商有新產品推出,都會搵人試吓,一來做吓推廣,二來可以測試市場反應。由於越來越多人玩Facebook、Blog等,所以佢哋就透過呢啲渠道,搵網友試新產品。
以為佢哋一定係試手機、軟件等新科技產品,錯!公關朋友講,BB尿片、奶粉,都係搵Facebookfans、blogger試用,等佢哋喺自己個網上地盤講番用後感受。呢一招真聰明,家陣啲消費者鬼咁精,你賣廣告硬銷,大家未必信,但身邊朋友話你知好唔好用,就信嘞!
網上商機無限,唔單止係商業層面嘅商機,對一般投資者亦都係投資亮點,就好似敏妮同股壇前輩講番今次出trip收穫時,佢即時話,要留意吓啲科技股,尤其做application嘅公司。又係嘅,搭地鐵成日見到隔籬乘客用iPhone上網,比起2000年科網股時代,家陣科網嘅應用會更實際,認識多一啲科技公司,唔難發掘到新投資機會。
溫敏妮