【挑戰金唱片】貨車改裝流動音樂車 石詠莉拉路人聽歌
蘋果日報 2017/09/15 16:37
鄧健泓旺角石詠莉Sukie
攝影：曹家誠
石詠莉（Sukie）今日到旺角朗豪坊出席唱片宣傳，現場有一架佢專屬嘅流動音樂車，Sukie話架車喺公司特登為佢打造，由貨車改裝，嚟緊四日將會去香港各處，邀請途人上車聽佢嘅新碟，佢話：「公司真係好錫我，放好多資源落去，從來都未試過有咁樣嘅待遇。」
Sukie仲透露十幾年前未入行時，曾經都喺旺角幫某位歌手派傳單，估唔到今日自己成為活動主角，所以有啲感觸。問到唱片銷情，佢話：「銷量已經過萬，聽公司講話要加印。」希望目標想買到幾多？佢話：「希望金唱片就OK啦，一步一步嚟，o依家唱片真係好難賣。」
Sukie又講到，呢排除咗要做新碟外，亦要忙住籌備同男友鄧健泓嘅婚禮，問到婚禮嘅詳情，佢話：「今年年尾舉行，但今日唔講住，遲啲會一次過公佈細節。」
石詠莉多謝公司幫佢改裝流動音樂車，嚟緊會請途人上去聽歌。
呢排忙緊宣傳，目標係金唱片，同時都要籌備婚禮。
男友鄧健泓今日都有嚟，但婚禮詳情未公佈住。