周五（30號）晚於會展舉行嘅「慶祝香港回歸祖國二十周年文藝晚會」，《蘋果》收到消息，指晚會本由無綫一手包辦製作，但中央台突然插手，無綫需突然坐歪，由全權控制變協力。

據本報收到消息，晚會嘅司儀係汪明荃、鄧梓峰同陳貝兒，場地已經開始set up，但工作人員每次出入都要搜身，而且有60至80警員喺現場睇實，高度戒備。

工作人員仲爆料話：「呢個騷嘅保安係史無前例咁嚴厲，唔止演出單位名單要有，所有幕後工作人員，唔理你係幫手揼釘、打燈，定係藝人身邊嘅梳、化、服同助手，通通都要上報個人資料，有人個名『出咗問題』，臨時話唔去得，要臨時臨急搵人頂，好麻煩。」

至於有幾多人名「有問題」？呢位工作人員就話清楚：「唔敢問咁多啦，呢啲騷都知麻煩㗎喇，但係突然間有啲人話唔俾入場喎，啲嘢跟開㗎嘛，好麻煩囉，唔知佢乜嘢定義，點樣先入得啦，人哋又唔係有案底，做嘢啫，但佢唔俾入你無佢符㗎！」

又話「慶回歸」，又勞民傷財兼動用大批警力保護習總，說好的與民同樂呢？騷一場，做俾邊個睇？你懂嗎？