雖然上屆友誼小姐，即係家姐張寶兒提名兼力撐，不過10號張寶欣都大熱倒灶，完晒成個比賽之後，家姐寶兒梗係做柴可夫接送妹妹，佢哋喺車上都做咗個live，，眼腫腫嘅寶欣講到落選心情，佢話：「其實參選咗之後，覺得自己進步咗好多，尤其喺講嘢方面，所以我對自己嘅表現好滿意！」

跟住揸緊車嘅寶兒，就講到佢舊年參加港姐，原來係妹妹做提名人：「當時拍《學是學非》，見到宣傳，幫你去報下，當初你幫我報嗰陣，我都有講笑成份，應該俾個機會實踐佢嘅夢想，如果你唔係想報名，點解會報名呢？所以我覺得你心裡係想，既然你覺得踏出呢一步係難，咁不如我去幫你喇！其實呢個過程都係真係唔容易，因為一定有人會唔鍾意你，又或者會拎我哋兩姊妹做比較！」寶兒仲話妹妹係一個特別嘅人，唔使靠家姐入行。

寶欣聽完之後就話：「有啲時候會忘記自己嘅夢想，細個想參加港姐，只係大個咗俾學業同工作分散咗，搞到唔記得夢想。直到上一年睇到電視，不如叫家姐去喇，呢個係細個嘅回憶！」之後寶兒同咗妹妹老麥，買咗個麥樂餐，魚柳包同雪糕當慶功！