前晚花旗股市終於升番1日，港股昨日梗係挾住個勢炒上，大跌市嘅平均線阻力經常都可靠，恒指升到10日線就冇力再上，晏晝又傳出法興業績勁蝕，港股就開始插水，升幅冇晒，仲要跌多500幾點，來回唔見咗成1400點，收市仲揸住成手貨都幾傷。

港股張圖都幾曳，今日嘅走勢好關鍵，如果再大跌低收，下個禮拜港股就NoEyeSee，因為期指就嚟結算，淡友head住咁多，相信造淡唔會客氣，雖然下個禮拜花旗仲有機會減息，但係預咗嘅嘢，唔會幫得好多，大家短炒，一定要維持細細注嘅策略，唔對路就要跳車。
港鐵C輪1499：港鐵（066）昨收30.25元，屬於有概念同抗跌力較強嘅股份，個市跌定，港鐵會升得快啲，可以吼位收集C輪1499，昨收33.5仙，有效槓桿4.6倍，博正股試33.7元，1499升上53仙，正股跌穿28.8元止蝕。