狄易達噚晚係九展開騷，因為呢個騷佢準備咗成個月，連女朋友都無時間得見，所以女友吳亞馨就專程台灣飛過睇男友個騷，除咗女友，達仔嘅爸爸、媽媽、家姐同哥哥都有嚟睇，唔怪得達仔係台上面咁感觸，搞到喊喊豬啦。

達仔成晚勁歌熱舞無冷場，跳足全晚，大騷舞技，搞下人肉金字塔，倒豎葱呀！真係睇到嘩嘩聲，現場仲有粉絲叫佢除衫，不過佢話留番下次紅館可以先除，佢話：「第一場又係最後一場，希望大家記得唯一場。」其間佢仲同經理人簡文滌講對唔住，達仔話：「對唔住，七﹑八年無咩賺過錢，我唔識點做人哋好紅好爆歌手，係咪一定要返大陸拍劇，係咪要全身名牌先叫做歌手，我鍾意做番自己就好開心。」

之後達仔就自彈自唱，唱到呢首冧歌《Bealright》，佢就突然轉Channel講普通話：「昨天是我們一周年，雖然很少見面，很感謝你，從來都很堅強面對思念，我好像當兵一樣，去了一個月沒回來，謝謝你對我的支持。」吳亞馨聽到梗係冧爆喇！之後，另一個感動位就係唱《高山低谷》嗰陣，達仔仲講到喊話：「唔捨得，經理人無放棄自己，驚自己無得再唱歌，要拍劇拍到天昏地暗。」當時大家發現吳亞馨都係度一齊喊，場面感人。

完騷之後，達仔接受深情訪問，講到佢嘅愛的宣言，佢激讚女友話：「女朋友好叻，好堅強，佢噚晚話一周年無慶祝，驚我會分心，佢比我更堅強面對思念，搞到佢成日得番自己一個人。下年年頭可以同佢去一個旅行。」

嘩！感動到咁，咁幾時娶亞馨，咪唔駛分開囉？達仔避答：「我有問佢會唔會唔想我做演唱會，佢叫我做自己鍾意做自己鍾意嘅嘢，畀好多空間時間我。」記者一再追問佢就話，達仔就話：「自己每次拍拖都好認真，總之0依家努力做嘢。」嗱！喺台上面嗰句「我唔識點做人哋好紅好爆歌手，係咪一定要返大陸拍劇，係咪要全身名牌先叫做歌手。」有人話擺明係寸緊同期出道嘅陳偉霆，達仔即刻解畫話：「絕對無，真係無，一定無。」相信達仔都唔係咁嘅人。

今個月21號就係達仔27歲生日，女友又會唔會同佢慶祝先，佢唔好意思咁話：「嗰日要做嘢，又要佢等，佢想我努力，佢好好，佢同我講，仲有幾年時間，叫我畀心機，係100分女友。」