韓國人氣綜藝節目《無限挑戰》噚日播出嘅一集邀得男神金秀賢、性感歌姬李孝利等人做嘉賓，不過收視不升反跌，有「國民綜藝」之稱嘅《無限挑戰》噚晚一集收視比上周跌咗2.4%，錄得10.1%，就快跌破雙位數。反而同檔嘅綜藝節目《不枋的名曲》就勁升，噚晚播出第一部及第二部收視分別為8.1%及10.8%，比上周錄得嘅5.9%及7.8%收視升咗唔少。

而噚晚一集《無限挑戰》有男神金秀賢助陣，曾參加保齡球職業選拔賽嘅金秀賢仲同成員通宵打保齡球，雙方展開保齡球大戰，原本上周一集金秀賢以一打五兼讓分50分都仍然大獲全勝，點知噚日播出嘅一集卻勁輸，令金秀賢都不能置信，最後佢先發現自己被成員整蠱。

《無限挑戰》成員因為上一集輸咗，所以就送餐車畀金秀賢做禮物，同時成員又自言因為輸波，所以佢哋之後都好勤力苦練保齡球，又話要同金秀賢再比試，金秀賢自己二話不說就答應，點知事實上佢就擺明上當，事關製作單位事先喺球道上整咗好多油，所以當金秀賢一擲個保齡球，個球就即滑出路線，反而成員就造馬，差不多次次都全中，令金秀賢驚訝得瞪大雙眼，仲表現得好沮喪。

最後精明嘅金秀賢終於發現破綻，仲驚覺自己被整鬼，佢先重展笑容，讓粉絲都大呼「可愛」。