當年今日
關於我們

【李八方online】林鄭細賞梁太得獎靚相

蘋果日報 2015/04/27 06:00

梁振英林鄭月娥唐青儀李八方ONLINE報業公會

今日係香港報業公會一年一度嘅頒獎禮,獎勵公會嘅成員報章過去一年出色嘅報道同新聞相片,大會主禮嘉賓係政務司司長林鄭月娥,林鄭花咗約3分鐘欣賞展板上約70份得獎作品,其間駐足7秒欣賞一幅相,何解佢咁著迷?因為相中人就係林鄭本人,相片捕捉到佢畀大批保安保護、氣定神閒嘅一刻。

而呢張相隔離,正正係梁振英太太唐青儀公開批評中大學者蔡子強「涼薄,冷血,刻毒」時,豎起兩隻手指嘅經典時刻,八方現場所見,林鄭都用咗約三秒,欣賞呢張得獎靚相㗎。