袁鳳瑛的歌聲在樂壇失蹤了20多年，「原諒話也不講半句　此刻生命在凝聚」這首由她主唱的《天若有情》，成為電影主題曲的經典，日前她應本報邀請着婚紗扮吳倩蓮，坐電單車演出一幕搞笑版，化傷心為笑聲。袁鳳瑛看過這部戲五次，迷戀過戲中的「華Dee」劉德華，她說：「佢做《龍在邊緣》已經幾迷，認識咗佢真人，佢做好多社會貢獻，其實勁佩服佢。」

問到是否想做吳倩蓮的角色？袁鳳瑛坦言：「其實恨㗎，好多謝《蘋果》畀我實現夢想。我覺得最經典係吳倩蓮喺天橋跪低，好傷心，自己好希望係happy ending，華Dee返嚟扶起吳倩蓮。」問生命中有否出現過華Dee？她感慨說：「雖然我做歌手日子唔長，但嗰幾年，幾靚仔又見過，幾有才華又見過，自己比較要求高，反而我係追求人生意義，愛情遇到有就有，如果冇唔好強求！」
隨緣的袁鳳瑛多久沒拍拖？她瀟灑說：「由我入行做歌手，已經冇拍拖，20幾年，91年到𠵱家，做完歌手做教育，超級忙，𠵱家對住咁多學生，可以將我嘅愛發放出去，唔一定要有愛情生活。」恨着婚紗嗎？袁鳳瑛坦言：「當然恨啦，所以自己買嚟着，好似今日咁，幾滿足，又有華Dee。」她不擔心孤獨終老：「我唔怕寂寞，enjoy一個人空間，當你要熱鬧，有學生知己，都好開心。我咁多愛心，梗係分晒畀學生，如果得一個愛情對象，會浸死佢囉。」

當年《天若有情》紅歌唔紅人，袁鳳瑛淡然說：「其實係冇感受嘅，因為當隻歌紅嘅時候，我未係真正入行，仲係返工嘅OL。我唱嘅時候首歌唔係叫《天若有情》，係叫《心裏的聲音》，到我唱完已經唔記得呢件事，反而Beyond嘅插曲我有印象，所以知道自己唱嘅歌變主題曲，有啲喜出望外。」然而，她只推出了三張唱片，就悄然離開樂壇：「我覺得幕前工作係人生一部份經歷，同埋當年嘅文化，我覺得自己唔係太適合，但𠵱家性格就可能適應啲，所以𠵱家積極啲，開心樂觀啲去面對，最緊要係我開始摸索到，喺娛樂圈點同人相處、遊戲方式係點。」
袁鳳瑛離開樂壇後修讀心理課程，近年主力做德育、演藝教育和心理輔導，還有教人唱歌，她說：「讀完心理同輔導，首先會幫助自己，我都好鼓勵藝人朋友，首先了解自己，你會幫到自己好多，調節咗之後，你對於身邊人同生活助力會好大。」
採訪：余燕儀、趙永傑
攝影：林德雄
化妝、髮型、婚紗：So So Bridal Makeup


難得生性暴龍哥創科眾籌夢，遭隱世肥報販秒殺！ https://goo.gl/hnEB7D

「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw