林鄭政府噚日以國安法之名，對壹傳媒創辦人黎智英等人大搜捕，令香港人睇清楚呢條林鄭聲稱只會影響「一小撮人」嘅法律，真正影響幾多人之後，估唔到連「夕爺」林夕都被官媒狙擊。

五毛老屈「歌頌暴力」

點解連「夕爺」都出事？原來佢近日將自己填詞嘅歌曲《約定》改詞，為因國安法流亡英國嘅羅冠聰打氣，點知又被中共官媒盯上。 話說以「亂港頭目」稱呼羅冠聰嘅《環球網》記者「尹艷輝」，噚日以「林夕和被通緝的『港獨』羅冠聰，還『約定』上了！」為題發文，文中大量引述五毛留言，批評夕爺「以扭曲事實的心寫出的歌詞」、「眼盲心更盲，他要歌頌暴力」、「有才無品，典範」。篇文大篇幅引述夕爺為羅冠聰所改嘅詞，無疑係想對夕爺亂扣帽子。

夕爺有冇「約定」羅冠聰，八方真係唔知，只知夕爺嗰手詞，真係能夠穿透人心，永遠都咁受歡迎。