清華大學百年「大壽」，中外政、商、學界猛人齊齊到賀，都咪話唔猛料。之前提過，四叔李兆基都會北上，先到清華，再去大連。今次四叔清華之行可謂威盡，華華收到料，除咗陀住慈姑椗嘅千億新抱徐子淇留喺香港安胎之外，四叔一家大細包括兩個仔家傑、家誠，女兒哥哥妹妹、親戚朋友，仲有四叔任發起人之一嘅培華基金一眾友好，上上下下大大小小一行80人，一齊去清華。

率80人北上撐場

咁叠友，做乜？咪就係四叔合共捐咗3億銀興建嘅清華大學李兆基科技大樓，舉行工程啟動典禮。本來普通一個動工典禮唔使咁誇嘅，但喺正清華100周年舉行，仲有中央政治局委員、國務委員劉延東一齊主持，當然要格外重視。
話說動工典禮上周六（23日）早上舉行，劉延東同日早上其實要出席清華其他活動，但都畀面四叔，據聞係因為05年劉延東仲喺統戰部時，曾經提議四叔設立「溫暖工程」基金，幫助貧困農民，四叔二話不說即捐3億，就係呢份人情，劉延東趕場都要畀面四叔。
當晚清華喺香格里拉飯店舉行答謝宴，四叔獲邀致辭，佢話：「香港話，說『財』為『水』，中國古話說『上善如水』。所以賺到錢，要好好灌溉萬物，我呼籲有『水』的人要對教育做貢獻，灌溉學生。」

劉延東畀面有因

四叔此行另一「戲肉」，係出席喺人民大會堂舉行嘅清華建校100周年慶祝大會，中央領導包括胡錦濤、溫家寶、吳邦國、賈慶林、習近平、李克強，全部列席，參與嘉賓8000人，正係座位難求，但四叔呢位「領隊」就留到超過30個位。

李華華
mailto:[email protected]