上年東亞（023）可以話經歷咗近90年來（今年係90周年生日）最黑暗嘅日子，除咗面對金融海嘯同雷曼迷債事件之外，仲被傳財政不穩，搞到被擠提。主席李國寶噚日喺公佈業績嘅記招上，主動提到擠提事件，感觸良多咁話：「學咗好多嘢！」

超人行動支持即入股

寶哥哥話，喺銀行界40年，擠提事件令佢獲益良多，最大得着係「Iknowwho'remyfriends」。咁邊個係佢真正朋友呢？睇番東亞擠提單嘢發生之後，高官同富豪好多人都力撐，有人出錢有人出口，東亞啲董事亦紛紛增持。不過講到行動最快最見效嘅，就非超人李嘉誠莫屬，因為擠提當日，連夜喺紐約趕返港嘅寶哥哥透露，已經收到超人電話，指對方好nice咁同佢講，話唔明點解啲人要去擠提咁話。擺明企喺你嗰邊呀，老友！
超人唔只安慰吓咁簡單，仲即刻喺自己荷包攞錢買東亞股票㖭。至於佢入咗幾多貨已經唔重要，最重要有人撐，東亞股價本嚟受擠提影響跌咗近7%，但超人一托，股票就升番。
寶哥哥一向交遊廣闊，朋友滿天下，但喺危急之中，真正出錢出力幫手嘅朋友有幾個呢？經歷過患難見真情之後，相信佢都心裏有數。寶哥哥做獨立非執董嘅生力啤（236）一向以「真正朋友」做宣傳口號，睇嚟直情可以考慮搵佢做生招牌㖭。

李華華
mailto:[email protected]