下周五就係新一屆區議會任期開始，多位現任同準議員都透過勞工處網頁請人，迎戰未來4年任期。八方發現唔少乳鴿出手都較現任議員闊綽。
喺沙田烏溪沙當選嘅乳鴿李永成絕對係「良心僱主」，以月薪高達1.5萬請人，5天工作，年假高達12日，放17日銀行假，男士更享5天侍產假，統統比法例基本要求高出一大截。民主黨「翻版李英愛」曾素麗（圖）以月薪1.2萬聘請議員助理，只要求中五程度。北區祥華區乳鴿仔陳旭明亦以月薪1.4萬請人，要求中七程度。
相反資深議員就手緊啲，民主黨涂謹申以月薪9,000蚊請人，要求大學畢業、一年經驗兼5天半工作。同樣做咗好耐議員嘅民建聯簡志豪，亦只以月薪9,000蚊請人。