鄧麗欣（Stephy）喺呢個月20日確診感染豬流感，成為本港首名豬流感確診藝人，佢喺確診前一星期去咗多個活動，更被狂轟唔戴口罩冇公德心。Stephy毋須入院，但要按時食藥同喺屋企自我隔離咗足足9日，前日佢正式復工，去咗佛山同數百歌迷聚會，佢話遲啲仲想去捐血㖭！
康復後嘅Stephy顯得精神奕奕，佢話因為屈咗喺屋企咁多日，所以能夠開工見歌迷就大感興奮，佢班歌迷都好關心偶像，仲猛話佢瘦咗唔少，歌迷亦無懼Stephy曾患豬流感，踴躍同佢握手，不過Stephy為免再中招，佢除咗上台冇戴口罩外，其餘時間佢都罩不離口，仲帶定消毒用品，以免再受流感煎熬。

感謝媽咪照顧

Stephy坦言經過今次病後，留意到以前唔多留意嘅事，佢話：「啲朋友有拎生果到我屋企門口，最感動係我媽咪唔怕傳染，全程喺屋企陪我，我休息期間除咗上網，仲有為新碟練歌，我睇新聞話患過甲型流感嘅人血液會有抗體，仲可以捐血幫患急性甲型流感嘅人，我稍後都會捐血，幫助有需要嘅人。」