上星期一本欄講超級補習社，引來一封電郵，兼有周刊記者想攞料。讀者王先生話想送兒女兩人入呢間補習社，希望介紹。
左丁山問過畀料嘅老友記，佢話無謂介紹咯，呢間補習社學生收到唔想收，如非有在學學生推介，兼且家庭背景好，呢間補習學校根本唔會收。橫掂生意咁好，補習社教師（兼職）月入四萬，收生太多，反而難以維持水平。你知啦，啲家長畀得咁多錢，要求好高，而且好多家長都係有頭有面之輩，唔可以得罪嘅。
補習學校咁好搵，諗落做家長真辛苦，送去國際學校，學費已經好貴，重要補習㖭。一年每個孩子花費二十幾萬，計埋去外地讀大學又用百幾萬；只係生一名嘅話，父母要預留教育費二百零三百萬，中產階級唔該快快儲蓄，不過一啲富豪人家，完全唔放錢在眼內，二三百萬，濕濕碎啦。

如果想慳錢，只係留一筆供仔女去外國讀大學，最好讓子女接受九年免費教育，慳一大筆先，再讀高中，所費並不太大，如果考到入本地大學，又慳一大筆。如果係嫌本港教育唔夠水平，係要送仔女去英美嘅話，儲夠一百萬港紙，慳慳哋，夠一名完成大學教育咯。如果你家貧出天才，個女考到十A，恭喜晒，一於申請哈佛大學，只要得咗嘅話，哈佛話明唔收學費（家庭收入每年少於四萬美元者）！
C總經理有三個公子，一個讀小學、一個讀中二、一個讀中五，佢問：「要預留幾多錢先至夠呢？」左丁山話：「你三位公子都讀國際學校、英童學校，預留五百萬差唔多嘞。」C總人工雖高，都不禁皺眉頭。