卓韻芝喪母後，同外婆一直相依為命，阿芝仲成日喺社交網同大家分享跟婆婆生活點滴，已接受未婚夫「閃電俠」求婚嘅阿芝，婚期已訂好9月15日喺中環外國記者會舉行，婆婆證婚，阿芝伯樂俞琤做主婚人，好姊妹鄭秀文（Sammi） 做伴娘。阿芝婚後會繼續同婆婆一齊生活，兩婆孫變三人行。

阿芝好孝順婆婆，上月底先同婆婆慶生，仲帶佢吃鰻魚飯，壽星婆好開心，一邊嘆日本餐，一邊睇雜誌。阿芝仲將婆婆照片po喺Instagram，網友都給婆婆送上祝福。不過，《蘋果》日前就喺銅鑼灣發現阿芝孖住未婚夫行街拍拖，兩人着住情侶tee，阿芝身型好fit，佢哋十指緊扣去咗崇光門口個巴士站，佢哋終點站係東區醫院女內科病房。其間阿芝有皺眉頭，相信係心情有點忐忑。

阿芝到底去醫院做乜嘢？開估啦，佢係去接婆婆出院，可能婆婆日前抱恙要留院，醫生批准佢出院，於是乖孫同準孫女婿就嚟接婆婆，佢哋辦出院手續，阿芝同未婚夫分工合作，好有默契，阿芝負責貼身照顧住婆婆，未婚夫就安頓佢哋坐喺大堂沙發等候，佢就去結帳同拎藥。大約等咗45分鐘，一切搞掂，未婚夫「閃電俠」先過嚟滙合佢哋，婆婆用長遮當柺杖「篤」住行，阿芝放慢步等婆婆，現場所見，婆婆精神唔錯，只係行動較慢，阿芝同未婚夫知道婆婆冇大礙才心情輕鬆起來，佢哋傍實婆婆慢慢行。「閃電俠」過嚟同佢哋一齊去門口搭的士方天后寓所。「閃電俠」坐的士司機位旁，阿芝陪婆婆坐後座，佢哋落車時，阿芝好細心扶婆婆落車，一行三人上樓休息。阿芝成日讚未婚夫係「暖男」，佢真係好心照顧阿芝同婆婆。

阿芝接咗婆婆出院回家，連日未有喺社交網分享婆婆近況，但佢噚日喺Ig限時動態分享咗同婆婆出外嘆西餐相片，全枱都係食物，佢哋仲飲酒，婆婆笑到見牙唔見眼，阿芝坐喺婆婆身邊為佢拎食物。《蘋果》今日打畀阿芝，問到婆婆留院，佢短訊回覆：「她之前暈，入院，check一大輪，沒事了，多謝關心。今天又陪她出去，還一起買餸，她喜歡行街市。」

精選娛聞，喺晒《娛果》
http://fb.com/appledailyent