蔣嘉琦已連贏八日，不是單憑手風順可以成事。依近月所有統計數字評級，筆者會將蔣小妹納入有七磅可減的大師傅，亦如之前提過，長捧一定「賺磅」。值得一提，蔣嘉琦騎超輕磅馬跑谷草成績亮麗，今季騎了18匹實際負磅為112磅或以下同類分子，當中12匹為10倍以下有飛馬，總成績三冠兩亞兩季一殿兩第五，只得兩駒沒獎金收。

今次蔣嘉琦亦有兩匹超輕磅座騎，分別為第二場負112磅的「銘記心中」及第五場孭111磅的「海之濤」，其中「銘記心中」乃小妮子首匹出策的吳廐馬，不過馬主的團體馬「好友心」早前由蔣嘉琦打破齋缽。

回說「銘記心中」，近三次跑谷草一哩均於取位或步速不就下所負不遠，大前仗遇上極慢步速，入彎時更直路在內叠一度受阻，仍交22秒6拉士輸個多馬位；其後一仗則以極快步速搶放，也不過距頭馬兩乘多；到剛戰抽12檔再跑谷草一哩，頭半程一直被頂在外叠蝕位，也捱到最後50內才開慢車輸兩個馬位。伸算「銘記心中」今次轉抽二檔並配蔣嘉琦再減七磅，應夠贏有餘，如見臨場票數出奇硬淨，全因專業投資者也是同樣計數。