喺寶勒巷，眼望住車頭右側嘅靚女們，特登停定後，左邊車門打開，只見到一團陰影。可否不分膚色的界限只係一句歌詞，實際見到個全黑人坐喺後座，依然無可避免咁打咗個突。雪白耀目嘅牙齒喺黑皮膚黑車廂下特別耀眼：「朋友！去土瓜灣實山街⋯⋯實沙街⋯⋯食三街⋯⋯十三街。」男乘客喺口音上嘅努力，我完全感受到，搶上車嘅不滿一掃而空，反正轉身走向後車嘅靚女們一袋二袋杏仁餅，載唔到都無乜可惜。

「朋友，唔該曬你，我知好近。」乘客唔好意思咁講，循例應句唔緊要，就問返佢喺邊度黎。「非洲！利一利牙。」每次同試圖講廣東話嘅外國人溝通，都係一次猜心嘅極致體驗。「利一利牙？」我熟悉嘅係香港地圖而唔係非洲地圖，唔知嗰邊有咩國家。乘客努力變換聲調，我都估唔到，直到佢用英文，我即刻明。
「哦，尼日利亞！波衫炒到好貴嘅。」「Yes Yes，我就係利一利牙黎。」經過失敗同嘗試後嘅成功，就算只係搞清楚地名，大家都好興奮。

來自尼日利亞嘅黑人，唔係嚟香港種粟米，而係做買賣。佢話喺香港買啲垃圾電話、平板電腦，返到家鄉就係高科技電子產品。「咁你搵夠咪可以返去做有錢人？」我將家傭嘅模式套咗落佢度。「I Love Hong Kong啦，唔返去喇。」真係好耐無聽過咁真誠嘅「我愛香港」，近呢一年講「我愛香港」嘅人，都省略咗後面句「但更愛黨」。

「香港唔會好多人歧視你咩？你搭的士都唔容易啦。」講真，黑色肌膚給他的意義，是偏差異見。「呢度無人打劫啊，非洲好危險㗎，一天黑就無人出街㗎。呢個時間未返屋企，我老婆會好擔心，喺香港佢就唔怕啦。」一有比較，香港都有啲優點嘅，一唔牽涉政治犯，警察就係高效嘅維和部隊。「咁都啱嘅，香港人驚你打劫多過有人打劫你啦，啲人避開你好過有人殺死你。」我假想呢種出街做嘢都要驚返唔到屋企嘅恐懼，都覺得香港唔錯。

「朋友，有無折呀？」疲倦的雙眼帶着期望咁望住我。我不需經過徬徨的掙扎就答到佢：「無呀，朋友。」

專欄作者簡介：
白告
我的文字你的故事紅的車廂，我的你的紅的。

Facebook專頁：
https://www.facebook.com/lazytaxi

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland